Vosoruošona
21.-24.augustā Nautrānu vydsškolā nūtyka školuotuoju i studentu kursi „Vosoruošona 2012”. Tymūs pīsadalieja 30 dalinīki nu Nautrānu, Špogu, Ludzys, Makašānu, Tiļžys, Bolvu, Sventes, Daugovpiļs, Rykovys, Viļānu, Stoļerovys, Viļakys, Cyblys, Baļtinovys, Brīžucīma, Upītes, Ruguoju, Rekovys, Kryšanu i pat Neretys i Ūgris, kai ari Saeimys deputats Jurs Viļums.
Lekceju temati beja vysaidi – latgalīšu rokstu volūda i literatura, jūs standarts i programma, folklora, muoksla, vītvuordi, viesturis vuiceišonys problemys, latgalīša identitate i etnomentalitate i cyti. Dalinīki cīši labi atsasauce par lektorim : Lideju Leikumu, Ilgu Šuplinsku, Angeliku Juško-Štekeli, Ilzi Spergu, Arni Slobožaninu, Valentinu Lukaševiču, Annu Vulāni, Marutu Latkovsku, Andru Zubko-Melni, Inetu Melni.
Beja ari cytys nūtikšonys kai ekskurseja pa Nautrānu pogostu, ailinīku vokors piertī ar Annys Rancanis, Valentina Lukaševiča, Juoņa Ryučāna, Līvejis Līpdruvītis, Gunta Rasima pīsadaleišonu, rodūšuos darbneicys, kuru vadeituojis beja Līga Rundāne, Maija Gailuma, Ineta Melne, i Baļtinovys teātra „Palādys” izruode „Ontans i plāšnīki”. Taipat dalinīkim naaizmierstams ruodiejuos atvodu bals ar doncuošonu leidz reitam.
Gon nūslāguma balā, gon vysuos puorejuos nūtikšonuos par dalinīku lobsajiutu guoduoja breivpruoteigūs paleigu grupa: Daiga Miščenko, Madara Krišāne, Vizma Boļše, Marta Zvejsalniece, Laura Melne, Agris Šķesters i Normunds Šķesters.
Ituos četrys dīnys Rogovkā beja cīši pīpiļdeitys ar latgaliskū i paruodieja, cik Latgolā ir daudzi lobuo i pozitivuo. Paļdis Latgalīšu volūdys, literaturys i kulturviesturis školuotuoju asociacejis vadeituojai Veronikai Dundurei i Nautrānu vydsškolys direktorei Anitai Žogotai par īguļdeitū dorbu „Vosoruošonys” organizeišonā!
Laura Melne, Vizma Boļše