Večerinka 2025
27.novembrī Rogovkā, Nautrānu Kulturys centrā, dažaiduos izlūksnēs skanēja latgalīšu volūda. Turpynojūt tradiceju, jau ūtrū godu Latgalīšu volūdys puļceņš ar 12.klasi organizēja Večerinka Latgolys vydsškolānim, īlyudzūt 14 Latgolys vydsškolu jaunīšus. Laika apstuokļu dieļ vysi navarēja atbraukt. Ar myusim kūpā beja J. Egleiša Preiļu Vaļsts gimnazejis, Aglyunys, Ludzys, Kuorsuovys i Baļtinovys vydsškolāni.
Šūgod Rogovkys kulturzeimis gosti īpazyna prezentacejā, taipat poši īpazeistynuoja ar sevi i sovu školu. Večerinkā vaļdeja sirsneiba i jautreiba, kū veicinuoja sasadraudziešona, rūtalis, daņči i dažaidi konkursi, kas beja saisteiti ar Latgolys kultury nūtykumim, ar latgalīšun dzīšmu atpazeišonu pec aproksta. Kotram daleibnīkam beja īspieja izapaust, paruodeit sovys zynuošonys i pīsadaleit vysuos aktivitatēs. Īsapazeišonys rūtalis i masu daņčus vyuceja školuotuoja Anna Garanča, veikleibys rūtaļu organizēja Annija Mazure i Aglyunys meitinis, Večerinkys vadeja Agija Vonoga ar Ernestu Ulbicānu, Ontona Kūkuoja veļtejuma dzeju Latgolai laseja Annija ar Andri Martinovu.
Pasuokums styprynuoja latgaliskū apziņu i radeja sirsneigu i draudzeigu vidi vysim kluotasūšajim. Paļdis vysim, kas organizēja, vysim, kas beja Večerinkā.
